صبّاحي

يرن الهاتف في دار أبو مفلح

فلحة:ألو

_ألو مرحبا,فلاح موجود

فلحة:أه لحظة مين أقوله؟

_قوليله محمود

تضع فلحة السماعة جانباً

أم مفلح:مين هظا يا فلحة؟

تنادي فلحة  

فلحة:يا فلااااااح..فلاااااااح تع رد هذا محمود ع التلفون

يأتي فلاح مهرولاً,يهمس:مين؟

فلحة:قلتلك محمود

فلاح:وشو بده

فلحة:وانا شو دراني شو بده خذ إسأله

فلاح:ألو

محمود:هلا كيفك فلاح,ولك زمان عنك

فلاح :ع راسي والله أنا بخير,سجلت مبارح وهيني قاعد بستنى القبولات كيفك أنت؟

محمود :هيني  قاعد بستنى زيي زيك!

فلاح:يالله هانت مش ظايل أكمن يوم

محمود:ولأنه مش ظايل إلا أكمن يوم أحنا والشباب حابين نطلع نفطر سوا ونسهر بعديها سهره صباحي شو قلت ..  بتيجي معنا؟

فلاح:حلو..حلو كثير خلص ماشي على الاكيد جاي ,اسمع بدي أقول لمسعود كمان يجي معنا

محمود:يا حيا الله بيك وبمسعود,ترا أنا حكيت معاه بس انت أكد عليه السلام عليكم

فلاح :مع السلامة ,بأمان الله

لم يكد فلاح يغلق السماعة

وظحة:شو لوين العزم أن شا الله؟

لم يجب فلاح واتجه إلى غرفته

وظحة:مفلح ,سمعت..هظا فلاح أبصر على شو ناوي هو وصحابه

فلاح:لا حول ولا قوة إلا بالله ,أي بتموتي إذا ما عرفتي بدنا نطلع مع الشباب نفطر بره.

أم مفلح:شو يمه؟تفطر بره؟لويش تفطر بره ؟لمين طابخين كل هالأكل أحنا؟

مفلح:لا أبيش روحه

فلاح :ليش فيش روحه,اسمع أنا بتفاهم مع أبوي

مفلح:فوت ع غرفتك وتورجينيش وجهك فيش روحه يعني فيش روحه

فلاح:أففف قلت لشب أني رايح تحرجنيش معه

مفلح :فيش روحه

يذهب فلاح إلى غرفته ..يفكر ويضرب أخماساً بأسداس

يحين وقت الأفطار

أبو مفلح:شو مالك يابا يا فلاح ليش ما بتوكل؟

فالح:يابا هظا فلاح بده..

يتدخل مفلح:قال بده يروح يفطر مع اصحابه بره ,يحط هالمصاري اللي اخذهن مبارح ويرجع يقول معيش مصاري وبدي مصاري

فلاح بنبرة حادة:هذي هي قصتك أنت المصاري ,تخافش طالع من مصروفي ومش محتاجك بقرش.

مفلح:لا مش بس المصاري انا بحب نلتم كلنا ساعة الفطور

فلاح:هسا صرت تشتاقلي ساعة ما أغيب.

مفلح: ,بعدين اكل بره مش نظيف وربك أعلم كيف بسوه

أم مفلح:أه والله يمّه,بعدين لمين انا بسوي كل هالأكل مين بده يوكله يمّه؟

فلاح:يمّه هي فالح ومفلح وفلحة ووظحة بياكلو هي وقفت علي يمّه.

أبو مفلح:خلص,خلص هسع كلو وبنتفاهم بعد الفطور.

سكت فلاح وفي داخله بركان يغلي

بعد الأفطار

رن الهاتف

نطت فلحة لترد

فلاح:زيحي غاد انا بدي أرد هظا اكيد واحد من صحابي

نظر إلى والده

فلاح:يابا اقلهم اني رايح بكره ولا لاء.

أبو ملفح:ماشي يابا روح,الله يرظى عليك بس لا تتأخر

فلاح:ألو

_هلا هلا فلاح كيفك أنا مسعود جاي بكره مع الشباب....أنا جاي لا تتأخر بنتلاقى عند الموقف وبنروح سوا بنشوفك سلام

فلاح:مع السلامة

فلحة:بابا خلينا أحنا نطلع يوم نفطر بره ,بنغير جو ملينا قعدة البيت.

وصل مفلح من عمله قبيل المغرب حاملاً بين يديه ((القطايف))
فلحة:تسلم إيديك يا مفلح والله من مبارح بدي أقوللكو بدنا قطايف
تخرج وظحة من المطبخ
وظحة:فلحة خظيهن من أخوك وروحي احشيهن بسرعة.
فلحة:لا يختي انا مش حاشيتهن خظي أحشيهن أنتي ,أنا بدي أكمل السلطة.
وظحة:تتحججيش بالسلطة,هاتيها أنا بكملها.
ترضخ فلحة وتقول متأففة:ماشي

تفرد فلحة (القطايفات) على طاولة المطبخ بجانبهن صحن الجبنة وصحن الجوز والقرفة,وتبدأ بالعمل

يدخل مفلح
مفلح:ولك شو هاظ اللي بتسوي,ليش هيك خربتيهن ,عارفة كم كيلو القطايف؟
فلحة والرعب بدا في عينيها:شو خربتهن ,هيهن ما احلاهن.

مفلح يستمر من حيث انتهى:أبو علي ببيع كيلو القطايف بليره وستين و أبو مسعود باعني اياه بخمسة وتسعين,عارفة أني السنة الماظية كنت اشتريه بستين قرش,اسمعي اتركي من ايديك ونادي وظحة تكمله..هيه يا وظحة تعالي خظي من اختك خبصت الدنيا تعالي.

ترتسم ابتسامة انتصار على شفاه فلحة وتقوم من مكانها لتحل وظحة بدلا عنها.

مفلح :طلي..أحشيهن منيح ولا تكبكبي جوز و جبنه,وقية الجوز بليره وخمسه وستين والجبنة بـ...
وظحة :خلص يا خوي ولا يهمك روح ارتاح أنت.
يخرج مفلح من المطبخ إلا أنه يعود سريعاً
مفلح:وظحة مش تقليهن وتكبي عليهن نص غلن زيت,أشويهن شوي اسكى وأوفر.
وظحة وقد بدأت علامات الضيق تظهر عليها:حاظريا خوي حاظر.
يخرج مفلح
وظحة بصوت منخفض:أي الله يعين اللي بدها تاخذك عليك.

بعد الأفطار تنتقم وظحة لنفسها (فبتلبس )فلحة (الجليات) وتهم هي لشوي القطايف.

فلحة:يمكن بحبو ياكلوهن بعد الصلاة .
ترمقها وظحة وتخرج لتسأل
وظحة:يابا بتحب توكل القطايف هسا ولا بعد الصلاة؟
أبو مفلح:لا هسع يابا بعد الصلاة ما فيش وقت يابا الله يرظى عليك
تعود وظحة للمطبخ:شفتي هسا بدهم اياهن
فلحة :صحتين,كثري اللي بجبنه أنا بحب الجبنه,وافصليهن مش تحطي الجوز والجبنة بنفس الصحن و..والقطر..
وظحة :التهي بشغلك أنتي.

تنتهي وظحة من أعداد القطايف وتقدمها للعائلة.


فلاح:وكو شو هاظ؟؟اكم مرة قلتلكو بحب القطايف قرص وبعدين مع هالسولافة؟

فلحة: هو بطّل هالعادة لو إنهن قرص كان طلبتهن عادي.

فلاح: انجق لو انتي اللي عامليتهن

ابو مفلح:لا حول ولا قوة اللا بالله العلي العظيم,ابتقعدوش ع اكله غير بتتهاوشو؟اسكت انت وياها عاد

"رمضان معهم احلى".

يتناول الجميع في دار أبو مفلح طعام الأفطار مترنمين على صوت شارة البرنامج,وبعد الأفطار يؤدي أبو مفلح و مفلح صلاة المغرب أما فلاح فيتسمر وفلحة أمام التلفاز.

فلاح:فلحة امانة انطيني الأرظي خليني ارن ع هالبرنامج بلكي كسبنا اشي.
فلحة:يووووووو ع هالعادة احنا شغل حظ يا فلاح؟اكم مرة صرت مجرب؟
فلاح:هاتي بسرعة بلا فلسفة قبل ما يجي ابوي.
يأتي الوالد من غايب علمه.
أبو مفلح:وك فلاح...لويش ما رحت عالصلاة؟
فلاح:يابا و الله ميت من الجوع يابا بكمل فطوري وبصلي يابا ما كنت رح اركز بالصلاة الاكل ماخذ عقلي.
الوالد:شو انت ولد صغير؟؟؟
فلاح:صليت صليت هسا يابا
فلحة:يابا والله ما صلّى بدو يحكي مع...
فلاح"وعيونه تتسع وترمق فلحة بجحرة مريعة:"يابا اتردش عليها...انت غشيم عنها؟؟
تطل الوالدة براسها من المطبخ
أم مفلح:يا ابو مفلح وين مفلح؟؟مش راح معك ع الصلاة؟؟
يجيب فالح الصغير:يمّا اكيد راح يشف سيجارة من الصبح وهو خرمان عسيجارة.
أم مفلح:سكّر ثمك يا ولد مفلح ما بدخن.
فالح:بكرا بتشوفي يمّا.
أم مفلح:طب خلص اسكت.قومن ظبن الاكل يا بنات وسوّن فنجان قهوة لأبوكن
وظحة تجحر فلحة مشيرة لها لتقوم وتفعل ما امرت به الوالدة ,وبدورها فلحة تجحر وظحة رافعة حاجبيها إلى الاعلى معلنة رفض الأوامر,ويستمر تبادل النظرات إلى أن يصرخ فلاح.
فلاح:ما اسمعتوش أمكن شو قالت أنت واياها.
فتهب فلحة (لظب الأكل)ووظحة لإعداد القهوة.

يحين وقت صلاة العشاء,تحصل المناوشات المعهودة
ام مفلح:وظحة يالله خنروح نصلي
فلحة:يمّا انا بدي اروح
وظحة:ابيش تروحي بتقعدي انتي والبنات تتصهونن وابنعرفش نصلي.
مفلح:يايا خنروح نصلي بالجامع اللي عند دار أبو جمال
ابو مفلح:لويش يابا هاظ اقرب
مفلح:يابا هاظ بطول وصوته مش حلو
ابو مفلح:خلص يابا مظلش وقت بكرا بنروح ع هظاك
يا ولد يا فلاح ..يالله عاد قوم اتوظا وتعال معنا
وفي المسجد.
أبو مفلح:والله فيه الخير هالأمام ,فرش الحصاير بره المسجد خلينا نصلي بالبراد بدل ما نصلي بالشوب جوه.
أبو مصطفى:لا والله لو خلنا نصلي جوه كان احسن,يعني هيك عاجبك نصلي بالشارع .
احد المصلين:مزبوط,مزبوط الكلام ..شو يا شيخ مطلعنا نصلي بالشارع,هسا الولاد بطلعوا يلعبوا لا بنعرف نخشع ولا بنفهم شو بنقرا.
نزولاً عند رغبة المصلين تقدم الأمام ودخل إلى المسجد ورفع يديه للتكبير .
أحد المصلين:والله هذه فتنة كل واحد بمشينا ع كيفه ,الدنيا شوب والواحد عايف حاله ما تخلونا نصلي بره.
مصلي أخر:هيه..أسمع تاقولك شو فتنة ما فتنة تقعدش تتمشيخ علينا,هسا بوصلك بـ....
تعالت الأصوات وتدافع المصلين وكادت الأيادي أن تشتبك,إلا أن ابو مصطفى وأبو مفلح حالا دون وقوع الشجار.
الأمام:يا أخوان..
من كان يؤمن بالله واليوم الأخر فليعظم بيت الله
من كان يؤمن بالله واليوم الأخر فليعظم بيت الله
من كان يؤمن بالله واليوم الأخر فليعظم بيت الله
إحنا بشهر فضيل وهذا الكلام ما بيجوز صفوا القلوب و
سامحوني إذا غلطت بحق حدا فيكو.
أبو مفلح:لا والله يا شيخ ما غلطت بحق حدا.
أبو مصطفى:كمل كمل الصلاة ياشيخ..

الله أكبر