راح صيامك

ام محمود في زيارة الى ام مفلح
ام مفلح:ها وين كاينين دار ابو مصلح مبارح؟ما سمعنالهم حس ع الفطور ولا بعتولنا اشي مش عادتهم...

ام محمود:كال معزومين عند بنتهم سلمى اللي تجوزت جديد

ام مفلح:اها..والله مش غلط لازم تعزمهم.

ام محمود:لا وكال شو...الست الخانم ما بتطبخ...جايبة اكل جاهز...

ام مفلح محركتا اصابعها يمينا وشمالا:يوووووووو...صار لام ستيت بيت وصارت تحلف بالطلاق!

ام محمود:يرحم ايام ما كانت تظربها كدام كل الناس واحنا نفزع..

ام مفلح:والله انك سادقة...قال لا بترد ولا بتصد,وصارت الغالية والحبيبة

ام محمود:كبرت عزيزة ام ركعة.

ام مفلح:استغفر الله الواحد صايم بس والله اشي بيحكي,شو ناقصها ما تطبخ

وظحة من بعيد:يمّا سلمى حامل باشهرها الاولى ويمكن مع الصيام ما بتقدر تطبخ

ام محمود:يوووووووو ,لا اول ولا اخر وحدة بتحمل,كنت حامل بمحمود برمظان واجيها من السوق مشي بالشوب...وارجع اطبخ لدار حماي وع الوين كان يعجب المرحومة !
يدخل أبو مفلح من الخارج أثناء حديث أم محمود يعلق
ابو مفلح:يا نسوان الدنيا صيام حرام عليكن!
ويكمل طريقه إلى غرفة أخرى
ام محمود:صحيح يا إبو مفلح,عزمك ابو محمد ع داره اليوم

ابو مفلح:لا والله ليش شو بي عندو؟؟

ام محمود:ييييييي كال صحاب كال,اليوم عازم زلام الحارة كلهم,وبدو يجيب كنافة.معكول مش عازمك يا زلمة؟؟

ابو مفلح:تلاقي نسي,حرام,.ولويش عامل الجمعة؟؟

ام محمود:كال عشان ابنه محمد اشتغل بالحكومة..
ابو مفلح:يالله الف مبروك,.بستاهل والله

ام محمود:لويش الحكي,والله محترم وبستاهل

ثم تلتفت إلى أم مفلح وتهمس
ام محمود:شو هالصاحب هاظ؟والله لو محلك لا بحكي مع مرته ولا بخلي جوزي يحكي معو

يرن الهاتف و تزف فلحة البشارة ,تنظر إلى أم محمود وتحرك حاجبيها(طالعة نازلة)

فلحة:بابا هاد ابو محمد بيعزمك عندو اليوم بعد المغرب

ام محمود (تتجلق) بفمها ذهابا وايابا وتآثر الصمت

ابو مفلح:راح صيامك يا ام محمود ع الفاظي


وظحة:يمّا حكت معي سهى قال بدها تلاقيني بكرا بالجامعة وانا بديش اروح

ام مفلح:وما تروحي تغيري جو يمّا زمان الك ما طلعتي

وظحة:يمّا بخسر صيامي..انا عارفة حالي,ما بطلع من عتبتة الدار غير بعجب ع العالم

ام مفلح:شوفو ع هالحجة...يعني الغيبة والنميمية حرام بس برمضان؟؟

وظحة:بشوف يمّا,بلكن حاولت اظل ساكته بس خلص وعد لابطلها هالعادة